ARTIFICIO NO LUME

 

  Xa non teñen a quen votarlle a culpa, e a pesar  do apagón informativo, resulta imposible esconde-los lumes, porque o cheiro das cinzas váiselles das mans. Entón recorren a supostos éxitos policiais, informado da detención de supostos pirómanos, que son postos en liberdade sen cargos polos xuíces. Coas súas tropelías  xa se pode dicir que en realidade crearon un pirómano.

   A limpeza de montes pra evitar incendios foi rexeitada polo Conselleiro de Medio Rural, que o pouco de apertalo algo xa saíu arremetendo contra do goberno do bipartito; demostrou, por se alguén o dubidaba que segue polos vieiros do seu xefe. Na nova Lei de Montes protéxese o beneficio particular, a costa de reducir garantías e seguranza ós veciños e o propio monte; como é o caso de reduci-la distancia de protección  das vivendas e a posibilidade de negocio coas areas queimadas.